1) Mootummaa naannoo Oromiyaatiif:- Akkuma waliinuu argaa jirru weerarri daangaa keenya irratti bifa haarayaan baname Godinoota shananuu waliin gahuun lubbuu saba keenya hedduu galafataa jira. Ummanniifi poolisonni daangaa irra jiran weerara kana ofirraa faccisuun tattaaffii cimaa godhaa jiran. Dhimmi kun garuu kan warra daangaa irra jiran qofarratti ilaalamuu qabu osoo hin taane kan ummanni bal’aan dirmachuufii qabuudha. Dirmachuun kunis Oromiyaa guututti mormii gochuun Abdi Ileefi warra isa duubaan isa bobbaasu akka morminu agarsiisuudha. Mormiin kun har’a Baha Oromiyaatti eegalee jira. Guyyootta itti aananitti magaalota biroo keessattis itti fufa jedhamee eeggama. Kanuma beekuudhaan mootummaan naannoo Oromiyaas mormiin kun bifa tasgabbaayeefi nagayaatiin akka raaw’atuuf qaamolee bulchiinsaafi nageenyaatiif qajeelfama barbaachisaa dabarsuu qaba.
2) Qeerroo Oromootiif:-Gaaga’ama ummanni keenya daangarraa jiru keessa seenee waliinuu argaa garaan nu gubataa jira. Hedduun keessan gara daangaatti dirmachuun falmaa keessa jirtan. Warri haftan bakkuma jirtanii qabsoo deeggarsaa gochuuf qophaayaa akka jirtan hubanna. Mormiin amma Baha Oromiyaatii eegalee jira. Guyyoota itti aananitti guutuu biyyaattii itti fufa jedhama. Mormiin kun akeeka yaadameef akka galmaan gahuuf hoggansiifi qindeessummaan Qeerroo murteessaadha. Ummanni keenya naamusaafi tokkummaadhaan mormii isaa dhageessisuu qaba. Akkuma amma dura walgorfachaa turre qabsoo keessatti naamusni bu’ara injifannooti. Naamusa malee injifannoon hin jiru. Kanaafuu namaafi qabeenya irra miidhaan akka hin geenye of eeggannoo barbaachisa. Keessattu Wayyaaneen jeequmsa uumuun saba biraatin walitti isin buuftee qabsoo maqaa xureessuu waan feetuuf qabeenyis ta’ee nageenyi saba Soomalees ta’ee kan biroo akka hin tuqamne isin gorfanna. Poolisiin Oromiyaa daangaa irraa ummata keenyaan waliin falmaa jira. Walakkaa biyyaattis tumsa akkasiitu barbaachisa. kanaafuu walitti hin bu’inaa.
3) Poolisii Oromiyaatif:- Miseeonsonni Poolisii Oromiyaa lola daangaa irraan ummata keenyatti baname ittisuuf Qeerroofi ummata waliin falmaa cimaa keessa jiran. Hedduun isaan lola kana irratti gootummaadhaan hoggansa kennuun wareegamanii jiran. Hedduunis madaayanii jiran. Kun seenaa hin irraanftamneedha. Seenaa keenya keessatti yeroo duraatiif ta’uu isaati. galatoomaa jenna. Amma poolisiifi ummata daangaa irraa falmaa jiruuf tumsuuf jecha mormiin nagayaa Oromiyaa guututti akka godhamu eeggama. Mormiin kunis har’a baha Oromiyaatti eegalee jira. Mormiin kun bifa nagayaafi tasgabbii qabuun akka raaw’atamu shoorri poolisii ol’aanaadha. Kanaafuu Qeerroon waliigaluun walitti bu’iinsi akka hin uumamanetti mirga ummataa kabajaa nagayas akka eegsiftan isinitti dhaamna.
Dhugaa qabna
Tokkummaan qabsoofna
Tarsiimoon masakamna
Ni injifanna!!”
The post Jawwar Mohammed irraa “WAAMICHA” appeared first on Bilisummaa.